“Padan ou ka dòmi, fè fenyan, ében simen gwenn, la ni lézòt moun ki ka twavay wèd èk ka akonpli tout sòt bagay. Alò, lè ou wè an moun jwenn siksé, sé pa bon chans i ni èk ou ni mal chans. Ou djòs ni pou lévé bonda fenyan’w-la èk koumansé twavay wèd. Bay kò’w ganm.”
******************************************************************* “Lè ou anbawasé ka jwi lavi’w èk éséyé fè’y pli mèyè, koté ou kay jwenn tan-an pou hayi lézòt moun èk tjenn yo asou lidé’w?” ******************************************************************* “Sèl mannyè pou akonpli anyen sé pou doubout palé-a èk koumansé fè an bagay.” ******************************************************************* “Sèl mannyè-a adan moun konnèt pou santi kò yo bon èk pou jwenn djèwté an lavi yo sé pou kwititjé lézòt moun èk éséyé fè yo pasé anba pyé. Tout kò yo ka gwaté yo lè yo wè an lòt moun ki pli bèl, ki pli entélijan, ki ni pli siksé, ében ki ka gadé pli kontan pasé yo. Alò, yo ka koumansé chaché tout bagay ki mové pou di konsèné moun-lan pou wè si yo sa bésé valè’y èk gwosi sa yo.” ******************************************************************* “Délè, lè dé moun adan an wilasyon, yo ka satisfè èk kò yo tèlman piskè yo kwè kon yo ja jwenn moun-lan yo té vlé, tout bagay annòd. Yo ka koumansé néglijé wilasyon-an èk pa ka menm otjipé zafè yo. Pandantan, an lòt nonm ében an lòt fanm ka otjipé zafè yo ba yo.” ******************************************************************* “Ou pa sa jenmen wanjé an pwoblenm andan an wilasyon si ou pa sav ki sa ki anékòz pwoblenm-lan. Ou sa fè sa ou vlé, anyen pa kay chanjé. Sitiwasyon-an kay vini pli mové jis tan yonn sé pawèy-la pa sa pwan’y ankò èk désidé pou foukan.” ******************************************************************* “Si ou wè ou vlé viv an lavi ki bon – yonn ki ni lajwa èk bon santé, ou ni pou pwépawé kò’w pou anchay twavay piskè i pa ézé. Si pyèsonn jenmen di’w lavi fasil yo manti. Pou akonpli anyen an lavi sé twavay wèd. Si ou wè ou sé an moun ki fenyan ou pa sa jenmen twapé èk jwi tout sa lavi ni pou ofè.” ******************************************************************* “Andji ou babyé épi an moun ou kwè ki ni tò jòdi-a kon lakoutim, di moun-lan pito, “mwen dakò épi’w. Ou ni dwa.” Menm si ou sav an tjè’w moun-lan ni tò, ou kay wéyalizé i pa ka tiwé anyen asou’w pou fè moun-lan kwè i ni dwa, èk la pa kay ni pyès chikann.” ******************************************************************* “Si ou pasé yon simenn èk tout bagay an lavi’w alé byen, ou ni pou pwan lavantaj li èk enjwi’y. I pa pòsib pou viv lavi’w san twakasman. Alò, ou sav si twaka pa vini simenn sa la i kay vini simenn pochen. Brace kò’w!” ******************************************************************* “Si ou pa ni lanmityé pou kò’w, si ou pa kontan lavi’w, pa kwè an wilasyon, an mawiyaj, ében an ti manmay kay mennen’w pli djèwté. Si ou ni labitid ka dépan asou bagay épi lézòt moun pou fè’w kontan èk pou bay lavi’w valè, djèwté kay toujou mawon’w.”
0 Comments
“Latè sala plen moun ki ka maché oliwon épi anchay bobo èk blésé. Bobo-a mové, i ka fè mal, èk délè i ka koulé, mé pyèsonn pa kay sav piskè tout moun ka kouvè’y byen pou lézòt moun pa wè’y. Bobo sa la nou ni sé bobo nou jwenn dépi tan nou té piti. Sèl mannyè pou i djéwi sé pou dékouvè’y.”
******************************************************************* “Yo di ou pa sa chanjé pyèsonn. Moun ka chanjé lè yo pawé pou chanjé tousèl. Pandantan, sèl chanjman-an ou sa fè si ou vlé fè an sitiwasyon pli mèyè sé pou chanjé kò’w. Mé ou pa an kalson toubannman pou ou ka chanjé bay moun tout tan-an kon sa. Délè ou ka las plè moun èk ou kontan épi kò’w mannyè-a ou yé. Alò, ou ni pou di moun-lan, “Wè pou kò’w.” ******************************************************************* “Pa kité moun kwennen’w épi bèl mannyè-a yo ka twété’w, èk sé bèl bagay-la yo ka fè ba ou. Pitèt sé an bagay ou dwé ka fè ki ka satisfè yo kon sa. Yo bwizen’w. Annik doubout fè sa ou ka fè-a èk ou kay wè ki mannyè yo enmen’w apwé sa. Tout lanmityé pa lanmityé.” ******************************************************************* “I tèlman ézé pou kité an moun pwézonnen lidé’w konsèné an lòt moun ou pòkò menm jwenn épi. Adan moun enmen mal palé lézòt moun tèlman yo sa fè’w hayi an moun ki pa jenmen fè’w anyen.” ******************************************************************* “‘Ou pa ka chanté piskè ou kontan, ou kontan piskè ou ka chanté.’ Konsa, chanté pli. Dansé pli! Wi pli! Ou ni kouway-la, ou ni dan an bouch ou toujou, èk ou pòkò ka mété pampers gwan moun. Ki sa ki pwoblenm ou?” ******************************************************************* “Sé pa difisil i difisil pou fè chanjman ki nésésè an lavi nou, nou djòs fèb èk fenyan. Nou enmen èspéyé lè nou vini malad ében lè nou pwès mò pou fè chanjman, èk nou ka fè’y tèlman vit – menm chanjman-an nou té kwè pa té posib.” ******************************************************************* “Lè ou jenn èk kouyon, èk ou benyen lògèy, tout bagay moun di’w, tout mannyè yo kwititjé’w, i ka afèkté’w tèlman akwédi lavi’w bout. Jou ka pasé èk ou ka katjilé toujou sa moun-lan di’w ében fè’w. Lè ou vini pli gwan èk pli savan, ou ka ni abilité-a pou innyowé anchay bétiz ében pou gadé an moun an zyé’y èk di’y “bo fès mwen”, san ou pèd donmi asou sa lé òswè.” ******************************************************************* “Tout moun bwizen dé kalité moun an lavi yo: an pawèy ki bèl ki kay pwonmèt pou jenmen kasé tjè’w, èk a bon jan pou bay moun sa la an bon kout pyé si i kasé tjè’w.” ******************************************************************* “Lavi dou, ou “happy kon an birthday”, tout bagay annòd. Sibitman, an ti katjil vini an lidé’w. Ou koumansé pwan ka katjil-la akwédi sé an gwenn tanmadòz toubannman. Ou ka bay “dlo” konstanman èk ou ka tounen’y oliwon an lidé’w. Avan ou sa bat zyé’w, zimèy ou ja chanjé – lavi pa dou ankò. Yon ti katjil ki fè sa – an ti gwenn.” ******************************************************************* “An pil manmay lékòl pa kay jenmen di sé titja yo mèsi lè yo kité lékòl. La ni moun ki ka fè byen an lavi yo èk yo ja wivé lwen piskè la té ni an titja lè yo té lékòl ki moutwé yo lanmityé èk anpéché yo pwan vyé chimen. Si ou sé an titja, pa jenmen kité ko’w vini dékonpòté pou sa. Mé sav an lidé’w ou ka fè an go kontwibisyon an dévelòpman péyi’w.” “Pli ézé mannyè pou jwi lavi sé pou manjé bon manjé, bwè, dansé, èk chanté. An moman sa la, tout pwòblenm ou, tout twaka’w ka dispawèt. Mé i pli mèyè lè ou sa gawoulé épi bon konpany èk an mòdéwasyon.”
******************************************************************* “Pwan ka ki moun ou palé épi konsené wilasyon’w. Adan moun té ni tjèk vyé èspéyans épi an nonm ében an fanm èk yo pòkò djéwi. Yo kontwayé toujou èk yo ni an waj kont lanmou. Yo vlé sèvi sitiwasyon’w pou pwan wivanj yo, pou yo sa santi kò yo pli mèyè. Alò, konsèy-la yo kay ba ou sé pa sa ki bon pou ou, mé sa yo menm té kay fè si yo té an sitiwasyon’w.” ******************************************************************* “Nou tout ka fè lèwè. Délè, i pli mèyè pou fè an bagay ki ni tò, pasé ou fè anyen.” ******************************************************************* “Adan moun di ki, kon nou vini pli gwan nou ka vini pli pwé kalité moun-lan nou sipozé yé. Mé m’a dakò épi sa. Mwen kwè kon nou vini pli gwan nou ka alé pli èk pli lwen nati wéyèl nou.” Jason C. Joseph ******************************************************************* “Sa ki fèt pa otan enpòtan kon mannyè-a ou déchifwé sa ki fèt.” ******************************************************************* “Padan ou la ka kwitijé an moun piskè ou touvé i pa ka viv lavi’y mannyè-a ou vlé’y viv li, moun-lan dwé plen djèwté èk ka ni an bon tan épi èspéyans li. An menm di tan, ou la ka viv andidan ti bwèt ou èk lavi’w sèk kon an pen wasi.” Jason C. Joseph ******************************************************************* “Èspéyans sé sa ou ka jwenn lè ou pa jwenn sa ou té vlé.” ******************************************************************* “Ou ni pou kopwann ki sa ki ka fè’w pèd avan ou sa kopwann ki mannyè pou ganyen.” ******************************************************************* “Adan fanm kwè piskè yo sé fimèl, yo bèl, èk yo ka pòté an ti sak sik, tout nonm oblijé vlé yo. Èk mwen pa sa blanmé yo pou kwè sa piské anchay nonm kon ti fonmi asou sik lè yo wè an fanm – ki i bèl ki i lèd , akwédi fanm sé an kwiyasyon nèf.” ******************************************************************* “Entèlijans sé entèlijans, lasajès sé lasajès. La pa ni an patikilé entèlijans èk lasajès pou wilizyon. Pwòblenm-lan sé, moun kannik voyé sèvèl yo asou vakans dépi sé anyen pou fè épi wilizyon.” ******************************************************************* “Si ou jwenn épi an mové chyen, pli mèyè bagay-la pou fè sé doubout la èk gadé’y an zyé. Si ou tounen do’w asou pwòblenm ou, yo kay mòdé’w an bonda’w.” ******************************************************************* “Si ou pè pou gadé bèt ében pou fè kò’w hont, ou pa kay jenmen atjivé lagwandè.” ******************************************************************* “Sé wilasyon ki ka fè’y pli ézé pou tout moun jwi lavi yo èk fè pwogwé. Alò, nou sa di èk konfyans ki wilasyon sé pli enpòtan bagay an lavi sa la – ki sé wilasyon èk fanmi nou, wilasyon èk jan nou, wilasyon épi sé moun-lan nou ka twavay épi, ében wilasyon épi doudou nou. Nou sipozé ka fè an pli go éfò pou dévlopé kò nou pou nou sa dakò pli byen épi lézòt moun.” ******************************************************************* “Si tout tan-a ou ni pou èspéyé lè ou adan zimèy-la pou fè sa ou ni pou fè, anyen pa kay fèt.” ******************************************************************* “I sipozé difisil pou jwenn siksé èk lagwandè. Si i pa té difisil tout moun té kay twapé’y.” ******************************************************************* “Ou pa kay jwenn tout sé bon bagay-la ou vlé an lavi’w pa aksidan ében pa miwak. Ou pa kay lévé yon bon maten èk jwenn an bon lavi la ka èspéyé’w. Ou ni pou katjilé avan ki sa ou vlé an lavi’w, mété’y asou papyé pou ékléwé’y, èk fè tout sa ou bwizen fè pou i sa fèt." “Fè jòdi-a bon èk yè kay pwan ka kò’y.” ******************************************************************* “Nou ni an labitid ka katjilé sa nou ja fè ében sa nou kay fè, lè tout katjil nou sipozé asou sa nou ka fè atjòlman – pwézantman.” ******************************************************************* “Délè, sé kwèstyon-an difisil èk sé wépons-lan byen senp.” ******************************************************************* “Délè, lè ou kwè an moun ja chanjé ében moun sa la pa kay jenmen konpòté kò’y adan an patikilè mannyè, sa pa wéyalité-a. Sa i vlé di sé an lokazyon ki jis kont djòs pòkò wivé pou fè moun-lan moutwé koulè wéyèl-li.” ******************************************************************* “Si ou pa sa aksèpté an moun ègzaktiman kon yo yé, simyé ou pa byen épi moun-lan piskè ou pa sa chanjé pyèsonn èk plizyè moun pa sa chanjé kò yo.” ******************************************************************* An bagay pé ni signifikans li pa kò’y menm, mé signifikans-lan nou jwenn adan’y sé toujou signifikans-lan nou ba li. ******************************************************************* Pli an nonm bay fanm lapouswiv, sé pli fanm-lan kay kouwi èk pli lwen nonm-lan fanm-lan kay wivé. Moman-an ou wè nonm-lan doubout kouwi dèyè fanm-lan èk koumansé alé an lòt diwèksyon-an, fanm-lan ka koumansé ba li lapouswiv. ******************************************************************* Yon moun ki zélé ni pli lagwandè pasé katwiven diznèf moun ki djòs antéwésé sèlman. ******************************************************************* “Anchay di jan’w kay oliwon toujou, lontan apwé tout sé doudou’w-la ja kité’w èk fè chimen yo. Alò, las néglijé sé jan’w èk moutwé yo pli lanmityé.” ******************************************************************* “Lè ou wè ou wivé an plas an lavi’w koté vyé pawòl èk vyé mannyè moun pa ka afèkté’w kon avan, ou sipozé pozé kò’w, mété dé pyé’w an ho, èk wéjwi, paskè sa sé an gwo akonplisman. Sé pa djè moun ki sa kité pawòl moun tonbé atè-a menm kon dlo ka glisé hòd an fèy dachin.” ******************************************************************* “Avan ou fè anchay lanné ka swiv wèv ou èk gaspiyé tan ki valowab, asiwé avan ki sé wèv-la ou ni sé vwéman sa ou èk pa sa manman’w èk papa’w, pwèt ou, ében sa sosiyété-a.” ******************************************************************* “Si la ni anyen ki pli anmèwdan an latè-a pasé lè moun ka palé’w mal, nètaman, sé lè pyèsonn pa ka diskité’w.” ******************************************************************* “La pa ni anyen ou pa sa fè. La annèk ni bagay ou pòkò éséyé fè ében apwann fè.” ******************************************************************* “Pa mandé pou an chay ki léjè; mandé pou an do ki fò pito.” ******************************************************************* “Sé sa ou apwann apwé ou konnèt li tout ki enpòtan.” ******************************************************************* “Ou pa té kay jenmen wivé koté-a ou yé jòdi-a si pa té pou asistans lézòt moun ki janti èk donnan. Alò, ou ni an obligasyon pou fè menm bagay-la pou lézòt pèp.” ******************************************************************* “Pa jenmen kwè ou pli mèyè pasé pyèsonn. Mé toujou kwè ki pyèsonn pa pli mèyè pasé’w.” ******************************************************************* “Si zyé’w toujou asou pwòblenm-lan sèlman, ou pa kay wè solisyon-an.” Posted in Inspirational Kwéyòl QuotesEdit |
AuthorThis is a collection of ideas translated into kwéyòl over the years. I do not assume authorship of any of them, and the original authors have not been ascertained. It is meant for those who already have a basic grasp of the language, but need practice in reading, writing, and discussing. ArchivesCategories |